Naaresto na ang suspek sa pagnanakaw ng urna sa mosuleo sa Manila Memorial Park sa Paranaque City.
Nakilala ng Paranaque Police ang naaresto na si Dionesio Layson, 30 anyos at dating caretaker sa sementeryo.
Gayunman, itinanggi ni Layson ang bintang at sinabing may dalawang lalaki ang lumapit sa kanya para ipabenta ang gold plated urn na ninakaw sa mosuleo ng pamilya Cruz.
Laman ng urna ang abo ni Maria “Pipie” Cruz, ang negosyanteng na natagpuang patay sa loob ng isang maleta sa Amerika noong 2004.
Kwento pa ng suspek, wala nang laman ang urn nang ibenta niya sa isang junk shop sa Las Pinas City sa halagang P1,900.
Inutusan pa umano siya ng dalawa na kumuha ng ibang abo sa sementeryo para ipalit sa abo ni Cruz para makuha ang pabuya na inilaan ng pamilya Cruz.
Nagsasagawa na ngayon ng follow-up operation ang Paranaque Police sa dalawang lalaki na tinukoy ni Layson at sa junk shop na pinagbentahan nito ng urna.