Pitong kulektor ng ilegal na operasyon ng STL, arestado sa Quezon

Arestado ang pitong katao na hinihinalang kulektor ng ilegal na operasyon ng small town lottery (STL) sa Lucena City at sa bayan ng Sariaya sa lalawigan ng Quezon.

Huli sa aktong nangungulekta ng taya sa Barangay Ibaibang Iyam ang suspek na si Zyra Cayao kasama ang iba pang kulektor na sina John Mark Pabalonia, Arthur Galon, Rodolfo Tiosan, Jean Jasolin at Rowena Cescano.

Ayon kay Quezon police chief Senior Supt. Rhoderick Armamento, nakuha mula sa mga suspek ang collection form para
sa STL, mga kagamitan at perang itinaya.

Sa Barangay Manggalang Uno naman sa Sariaya, naaresto si randy Mayuga habang nangungulekta din ng taya.

Nabigo umano ang mga nadakip na suspek na magpakita ng lehitimong ID na mula sa Pirouette Gaming Corp. – ang lehitimo at lisensyadong STL operator sa lalawigan.

Kakasuhan ang mga suspek ng paglabag sa Republic Act 9287 o An Act Increasing the Penalties for Illegal Numbers Game.