Sa araw ng Biyernes, inaasahang dadating sa bansa ang labi ng Pinay na natagpuang nakasilid sa loob ng freezer sa Kuwait.
Kinumpirma ng Department of Foreign Affairs na inihahanda na ng Philippine Embassy sa Kuwait ang pagpapabalik sa mga labi ng Pinay Household Service Worker na si Joanna Demafelis sa bansa.
Si Demafelis ay matatandaang natagpuan na wala nang buhay at nakasilid sa loob ng isang freezer sa apartment ng kanyang mga amo na mag-asawang Lebanese at Syrian noong nakaraang linggo.
Ayon kay Ambassador Rene Villa, patuloy ang kanilang pakikipag-ugnayan sa Ministry of Interior ng Kuwait upang matiyak na mabibigyan ng hustisya ang pagkamatay ni Joanna.
Maging ang mga taga-Kuwait aniya ay nagimbal sa sinapit ng biktima at umaasang agad na malulutas ang pagpatay sa OFW.