Hinikayat ni Anakpawis Rep. Ariel Casilao ang pamahalaan na gamitin ang ekta-ektaryang agricultural lands sa bansa upang pagtaniman ng palay para tumaas ang suplay ng bigas sa bansa.
Ayon kay Casilao, mayroong apat na milyong ektaryang lupang agrikultural ang bansa at kung ito ay gagamitin para sa food production lalo na sa palay ay hindi na kakailanganin na mag-import ng bigas.
Iginiit nito na dapat gawing prayoridad ng gobyerno ang pagbili ng palay mula sa mga lokal na magsasaka upang hindi maging dependent ang bansa sa rice imports.
Paliwanag ng kongresista, ang patuloy na pagtangkilik ng bansa sa mga imported rice ang dahilan ng mga problema ng mga lokal na magsasaka.
Bukod pa sa nababawasan na ang mga lupang sakahan dahil sa land conversion, umaangal din ang mga magsasaka sa kawalan ng subsidiya mula sa gobyerno at kawalan ng genuine agrarian reform.
Ginawa ng mambabatas ang rekomendasyon kasunod ng kakaspusan ng National Food Authority ng suplay ng bigas.