Number coding scheme ipapatupad na sa Cavite simula bukas

Bukas, February 5, ay magsisimula nang ipatupad ng pamahalaang lokal ng Cavite ang number coding scheme sa buong lalawigan.

Sa isang pahayag, nakasaad na sa lahat ng mga pangunahing kalsada ipapatupad ang number coding scheme. Ito ay ang kahabaan ng Aguinaldo Highway, Governor’s Drive, at Molino Road.

Ibig sabihin lahat ng mga sasakyan na mayroong plate number at conduction sticker na nagtatapos sa 1 at 2 ay hindi maaaring bumyahe kapag Lunes, 3 at 4 kapag Martes, 5 at 6 kapag Miyerkules, 7 at 8 kapag Huwebes, at 9 at 0 kapag Biyernes.

Epektibo lamang ang naturang number coding scheme simula alas-7 hanggang alas-10 ng umaga, at alas-3 ng hapon hanggang alas-7 ng gabi.