18 lalaki, inaresto sa Maynila para matiyak ang seguridad sa Traslacion
Arestado ang 18 katao sa ikinasang SACLEO o Simultaneous Anti-Crime and Law Enforcement Operation sa Palanca St. sa San Miguel, Maynila na malapit sa dadaanan ng Traslacion.
Tatlo sa kanila ang nahulihan ng mga sachet ng shabu habang ang iba ay hinuli dahil sa iligal na pagsusugal sa kalsada.
Nakilala ang tatlong suspek na sina Edres Guindolongan, Solais Mama, at Jommel Bora.
Si Guindolongan ay nakuhanan din ng 9 mm pistol.
Ayon sa Manila Police District Station 8, tuwing bisperas ng Traslacion, nagsasagawa talaga sila ng anti-criminality operations para matiyak na ligtas ang mga dadalo sa Traslacion.
Habang rumoronda, gabi ng Lunes, nakita raw nila ang mga kalalakihan na nagsusugal at dito na nila ito nilapitan.
Nang makapkapan isa-isa, nakuhanan na nila ito ng iligal na droga at baril.
Mahaharap sa kasong illegal possession of drugs ang tatlo, dagdag na kaso naman kaugnay sa paglabag sa gun ban ang kakaharapin ni Guindolongan habang illegal gambling naman sa iba pang nahuli.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.