236 Pinoy na naapektuhan ng Hurricane Irma sa Caribbean, iuuwi sa bansa

By Justinne Punsalang September 14, 2017 - 04:29 AM SHARE(S):

 

Nakatakda nang pauwiin ang 236 na Pilipinong lubhang naapektuhan ni Hurricane Irma sa mga isla ng Caribbean.

Ayon kay Department of Foreign Affairs Secretary Alan Peter Cayetano, nasa British Virgin Islands na ang response team ng Pilipinas na nagmula pa sa Washington DC.

Ani Cayetano, pupunta ang naturang response team sa US Virgin Islands para simulan na ang paglikas sa mga Pinoy na naapektuhan ni Hurricane Irma.

Sa latest report ng embahada ng Pilipinas sa Estados Unidos, nasa 160 hanggang 180 na mga Pinoy sa British Virgin Islands ang naghihintay ng repatriation, habang dalawampu sa Anguilla, at tatlumput anim naman sa St. Martin.

Dagdag pa ni Cayetano, maaaring sa Lunes, September 18, ay magsisimula na ang pagpapauwi sa mga Pilipino sa Caribbean islands.

Ngunit nilinaw ni Cayetano na magaganap lamang ito kung hindi magkakaroon ng problema sa logistical at administrative requirements para sa repatriation ng ating mga kababayan.

Samantala, nauna nang sinabi ng DFA na posibleng gumamit sila ng chartered plane para sa pagpapauwi ng mga Pilipinong lubhang napinsala ni Hurricane Irma sa mga isla ng Caribbean.

TAGS:

Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.