Pinagmulan ng avian flu virus, hindi sa migratory birds ayon sa dating mayor ng Candaba

By Mariel Cruz August 13, 2017 - 09:02 AM SHARE(S):
INQUIRER FILE PHOTO

Nilinaw ni dating Candaba, Pampanga Mayor Jerry Pelayo na hindi migratory birds ang nagdala ng avian flu o bird flu virus sa bansa.

Ayon kay Pelayo, walang migratory birds sa bayan ng Candaba noong panahon na maraming pugo ang namatay sa bayan ng San Luis.

Matatandaang noong nakaraang July, umabot sa 15,000 na pugo ang namatay sa San Luis na malapit sa Candaba.

Pinalagan ni Pelayo ang teorya ni Agriculture Sec. Manny PiƱol na migratory birds ang nagdala ng avian flu virus sa bansa.

Sinabi din ni Pelayo na maaaring ang mga kontaminadong Peking ducks na ipinuslit sa bansa ang pinanggalingan ng naturang virus.

Pero sinabi ni Dr. Ronnie Domingo, veterinary epidemiologist ng Bureau of Animal Industry, sa ngayon ay iniimbestigahan pa rin kung ano ang pinagmulan ng virus.

Dagdag ng dating alkalde, dapat ay kumunsulta muna ang gobyerno sa mga expert at scientist bago kinumpirma ang bird flu outbreak sa Pampanga.

Matagal na panahon na aniyang bird flu-free country ang Pilipinas.

Giit pa ni Pelayo, hindi mabubuhay ang bird flu virus sa lugar na mas mataas sa 28 degress celsius ang temperatura, batay na rin sa pahayag ng maraming eksperto.

Umaasa ang dating alkalde na magiging maingat ang pagtugon ang pamahalaan sa naturang isyu.

TAGS:

Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.