Inter-agency task force para mamonitor ang Yolanda Rehabilitation, binuo ni Duterte
Bumuo si Pangulong Duterte ng inter-agency task force (IATF) na mangangasiwa sa isinasagawang rehabilitation efforts ng pamahalaan sa mga lugar na sinalanta ng Bagyong Yolanda.
Nilagdaan ng pangulo ang Administrative Order 5 na nagsusulong ng pagbuo ng coordinating body para masiguro ang mahusay at epektibo na koordinasyon ng mga ahensya ng pamahalaan na kabilang sa isinasagawang rehabilitasyon.
Ayon sa administrative order, ang task force ay ang magiging central committee ng mga pang-ehekutibong kagawaran at opisina kabilang ang mga korporasyong pagmamay-ari at pinangangasiwaan ng gobyerno.
Pangungunahan ang IATF ni Cabinet Secretary Leoncio Evasco na siya ring Presidential Assistant for the Visayas at Presidential Assistant for Special Concerns.
Kabilang sa mga miyembro ng task force ang mga kalihim mula sa Department of Agriculture, Budget and Management, Education, Environment and National Resources, Interior and Local Government, Public Works and Highways, Social Welfare and Development, Trade and Industry, at National Economic and Development Authority.
May papel ding gagampanan ang chairperson ng Housing and Urban Development and Coordinating Council, executive director ng National Risk Reduction Management Council, general manager ng National Housing Authority at mga administrador ng Land Registration Authority, Local Waterworks Utilities Administration, National Electrification Administration, National Irrigation Authority, at Philippine Coconut Authority.
Ang task force ay inatasang magbigay ng ulat sa pangulo kada buwan o sa tuwing hihilingin ng punong ehekutibo.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.