Kadamay may 7-araw para lisanin ang mga bahay sa Pandi
Binibigyan na lamang ng pitong araw ng National Housing Authority ang mga miyembro ng Kalipunan ng Damayang Mahihirap o Kadamay para lisanin ang mga bahay na kanilang inokupa sa Pandi, Bulacan.
At kung hindi, sila ay sapilitang paalisin sa naturang lugar.
Ito ang nilalaman ng mga ‘eviction notice’ na ipinaskil ng mga tauhan ng NHA sa mga bahay na iligal na pinasok ng mga miyembro ng Kadamay sa anim na low-cost housing project sa naturang lalawigan.
Binabanggit rin sa mga eviction notice ang karapatan ng gobyerno na sapilitang paalisin ang mga squatter colony o government resettlement project at maging ang mga illegal occupant sa mga tahanan na pinangingasiwaan ng ahensya.
Ang naturang alituntunin ayon sa mga eviction notice ay napapaloob sa Presidential Decree No. 1472 na ipinalabas noong panahon ni dating Pangulong Ferdinand Marcos.
Unang tinungo ng mga taga-NHA ang Villa Elise sa Bgy. Masuso at isinunod ang paghahain ng eviction notice sa Padre Pio housing project sa Bgy. Cacarong Bata at cacarong Matanda.
Nagtungo rin ang NHA sa Pandi Heights 2 at 3 sa Bgy. Mapulang LUpa at Villa Louise sa Bgy. Siling Matanda.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.