Executives ng teleseryeng Till I Met You, ipinatawag ng MTRCB dahil sa kontrobersyal na sex scene
Ipinatawag sa isang kumperensya ng Movie and Television Review and Classification Board (MTRCB) ang executives ng primetime teleserye ng ABS-CBN na “Till I Met You”.
Ito ay matapos na makatanggap ng feedback ang MTRCB hinggil sa “daring” na eksena sa pagitan nina Nadine Lustre at James Reid na umere noong October 25.
Sa liham ni MTRCB Chairman Toto Villareal, kabilang sa mga pinadadalo sa conference na gaganapin sa November 10 ang direktor ng teleserye na sina Antoinette Jadaone at Andoy Ranay, ang executive producer na si Arnel Nacario at writer na si Shugo Praico.
Nakasaad sa liham na batay sa feedback ng mga manonood, ang October 25, 2016 episode ng “Till I Met You” kabilang na ang lovemaking scene nina JaDine sa loob ng sasakyan bagaman mayroong SPG advisory ay “unfit for television”.
May natanggap ding feedback ang MTRCB kaugnay sa October 26 episode ng nasabing programa.
“The 25 October 2016 episode includes a purportedly daring lovemaking scene inside a motor vehicle, which some audiences found to be unfit for television (despite its ‘SPG’ advisory). As regards the 26 October 2016 episode, we received feedback as to the casual use of the words ‘sex lang yan’ without reference to, or in disregard of, the institution of marriage,” nakasaad sa liham ni Villareal.
Samantala, ang October 27 at 28 episodes naman ng teleserye ay nagtataglay umano “sexually teasing” na eksena at nilagyan lamang ito ng PG o Parental Guidance advisory.
Gaganapin ang conference sa November 10, alas 2:00 ng hapon sa MTRCB Adjudication Room sa Quezon City.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.