CIDG, malapit nang mabuo ang pinal na imbetigasyon kaugnay sa Bilibid riot
Unti-unting nang nabubuo ng Criminal Investigation and Detection Group (CIDG) ang tunay na naging ugat ng nangyaring di umano’y riot sa Building 14 ng New Bilibid Prison noong Miyerkules.
Nakakuha na ng kopya ng video footage ang CIDG sa loob ng nasabing piitan kung saan namatay ang convicted drug lord na si Tony Co at ikinasugat naman ng ng iba pang high-profile inmates na sila Jaybee Sebastian, Peter Co, Vicente Sy at dating police Chief Inspector Clarence Donggail.
Ayon kay CIDG Director Chief Supt. Roel Obosan, hindi naatasan ang Bureau of Corrections upang pangunahan ang nasabing imbestigasyon upang maiwasan ang pagdududa sa kalalabasan ng imbestigasyon.
Sa ngayon, tutok ang imbestigasyon sa mga umano’y umatake sa mga biktima sa Building 14 riot matapos makakuha ng mga testimonya at pahayag mula sa mga high-profile inmate, maging sa mga nakasaksi dito.
Samantala, hindi na isiniwalat ng CIDG Chief kung ilan ang mga umatake sa nasabing riot hangga’t hindi pa pinal ang imbestigayson ukol dito.
Naipakita na din ng CIDG sa SOCO ang physical evidence na kanilang nakalap sa nasabing stabbing incident.
Gayunman, hindi naman nagsabi ng takdang araw ang CIDG Chief kung kailangan matatapos ang buong imbestigasyon ngunit nais aniyang matapos ito sa madaling panahon.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.