Lalaking nag-aasikaso ng labor case sa NLRC, patay, matapos pagbabarilin
Patay ang isang lalaki matapos pagbabarilin ng mga riding-in-tandem sa kanto ng Banawe at Quezon Avenue sa Quezon City.
Kinilala ang biktima na si Redelberto Miralles Dee.
Naganap ang krimen pasado alas-8:30 ng umaga sa harap mismo ng National Labor Relations Commission (NLRC) sa Banawe Street.
Ayon sa security officer ng NLRC na si Perlito Gabin, pagkababa ni Dee sa harap ng gusali ay naroon na ang dalawang suspek sakay ng motorsiklo at agad pinagbabaril ang biktima.
Base sa mga nakuhang dokumento mula sa biktima, lumalabas na nag-aasikaso ng mga isyu ng mga driver ng taxi company na RNE si Dee, at kabilang sa mga nakita mula sa kaniyang mga dalang dokumento ay ang schedule ng nakatakdang hearing sa NLRC ngayong araw.
Wala pa namang nailalabas na pahayag ang pulisya sa kung ano ang posibleng motibo sa pagpatay kay Dee.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.