Hidilyn Diaz, binati ng Malakanyang sa pagkapanalo ng silver medal sa Rio Olympics
Proud si Pangulong Rodrigo Duterte sa pagkakasungkit ng silver medal ni Hidilyn Diaz sa Rio Olympics na ginaganap sa Rio de Janiero sa Brazil.
Ayon kay Presidential spokesman Ernesto Abella, ipinaabot ng pangulo ang kanyang pagbati kay Diaz.
Nagbubunyi aniya ang pangulo dahil natuldukan na ang dalawampung taong medal drought ng Pilipinas sa Olympics.
Makaraang masungkit ni Diaz ang silver medal para sa weightlifting event, sinabi ni Abella na “truly change has come.”
“The Philippines and the president are honored and proud of Hidilyn Diaz’s Silver Medal win at the Rio Olympics. We extend our sincerest congratulations and celebrate the end of the medal drought. Truly change has come,” ayon kay Abella.
Si Diaz ang kauna-unahang non-boxer na Filipinong atleta na nakasungkit ng medalya mula noong 1936.
Sa kaniya namang pahayag sinabi ni Presidential Communications Office Sec. Martin Andanar na kahanga-hanga ang determinasyon ni Diaz na nagresulta sa pagkakasungkit niya ng medalya.
“Congratulations, Hidilyn, our first Olympic medalist from Mindanao. Mabuhay ka at ipagmamalaki ka naming lahat,” ang pagbati ni Andanar.
Matatandaan na pinanguahan ni Pangulong Duterte ang send-off sa mga atletang pinoy sa Palasyo ng Malakanyang.
Triniple rin ng pangulo ang allowance ng mga atleta mula sa $1,000 ay ginawa itong $3,000.
Dahil sa pagkakapanalo ni Diaz ng silver medal, makatatanggap siya ng P5 million na reward sa ilalim na rin ng National Athletes, Coaches and Trainers Benefits and Incentives Act of 2001 o Sports Benefits and Incentives Act of 2001.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.