Kahulugan ng salitang “salvage” sa Pilipinas noong rehimeng Marcos, sinariwa ng Malakanyang

Ang Presidential Communications Development & Strategic Planning Office (PCDSPO) ay palagiang nagpo-post ng informative tweets partikular ng tamang paggamit sa mga wikang Filipino at tamang kahulugan ng malalalim na wikang Filipino.

Tinatawag nilang WIKApedia ang nasabing informative tweets na inilalagay sa twitter account na @govph at sa facebook page na “Official Gazette of the Republic of the Philippines”.

Ilang lamang sa mga itinuturo sa WIKApedia ang tamang paggamit ng “Ng” at “Nang” sa pangungusap, kahulugan ng salitang “manigo”, “makapili”, “isputing” at iba pa.

Pero sa araw na ito, ang kahulugan ng salitang “salvage” sa Filipino ang naka-post sa WIKApedia ng Official Gazette.

Nakasaad sa post sa twitter at facebook na ang kahulugan ng “salvage” sa ingles ay “gawain upang iligtas sa pagkasira ang ari-arian”.

Sa Filipino, sinabi ng WIKApedia na ang kahulugan ng “salvage” ay “pagpatay sa paraang biglaan at marahas”.

Sa ibaba ng post, nakasaad ang paliwanag na noong panahon ng Batas Militar nang magkaroon ng sariling kahulugan ang “salvage” sa mga Pilipino dahil sa “talamak na pagpatay lalo na sa mga taong laban kay Marcos”.

Ipinapalagay umanong hango ang ibinigay na sariling kahulugan ng mga Pinoy sa salitang “salvage” sa salitang “salvaje” sa Espanyol na ang ibig sabihin ay gawaing masama o hindi maganda.

Ikinainis naman ng ilang netizens ang nasabing post ng Official Gazette ng Malakanyang.

Anila bias ang post na ito na patungkol sa rehimeng Marcos lalo pa at ngayon ay gitgitan ang laban sa pagitan nina Senator Bongbong Marcos at Rep. Leni Robredo sa pagka-bise presidente.

Noong Miyerkules, May 11, ang salitang “desaparesidos” naman ang binigyang kahulugan sa WIKApedia. Nakasaad sa post na ang “desaparesidos” ay bansag sa mga “taong nawala at ‘di na nahanap noong panahon ng Batas Militar”.

 

 

 

TAGS: WIKApedia, WIKApedia