Bagama’t halos patapos na ang 16th Congress, nanumpa ang dalawang Kongresista bilang bagong miyembro ng Mababang Kapulungan ng Kongreso.
Kinumpirma ni House Speaker Feliciano Belmonte Jr., na nadagdag sa roster ng House of Representatives sina Mary Elizabeth Ty Delgado at Raul Daza.
Ayon kay Belmonte, ipinatupad na niya ang final ruling ng Korte Suprema na maupo si Ty Delgado kapalit ni Philip Pichay bilang Surigao del Sur 1st district Congressman.
Matatandaang pinatawan ng conviction si Pichay dahil sa 4-counts of libel.
Sinabi pa ni Belmonte na si Raul Daza ang papalit kay Harlin Abayon bilang 1st district Congressman ng Northern Samar.
Paliwanag ni Belmonte, bigo na makakuha ng Temporary Restraining Order o TRO si Abayon mula sa Korte Suprema, kaya naging pinal ang pasya ng House of Representatives Electoral Tribunal o HRET.
Sa rules, nagiging final ang HRET decision limang araw matapos ang promulgasyon maliban kung may TRO.
Matatandaang naghain si Daza noon ng election protest sa HRET laban kay Abayon dahil sa umano’y dayaan sa bilang ng mga boto noong 2013 elections.
Naproklama si Abayon dahil natalo umano nito si Daza sa 57 votes.
Una rito, pinanumpa para makaupo sa pwesto si Lord Allan Velasco bilang kinatawan ng Marinduque kapalit ni Regina Reyes na nakwestyon naman ang citizenship.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.