Special session para sa override sa Aquino veto sa SSS pension hike, iginiit ng isang mambabatas
Mismong si Pangulong Benigno Aquino III na ang hinamon ni Bayan Muna Party List Rep. Neri Colmenares na magpatawag ng special session, upang maituloy ang planong override sa veto sa SSS pension hike bill.
Kagabi, sa huling session day ng kamara para bigyang daan ang halalan, bigo na maisulong sa plenaryo ang override dahil nag-adjourn ang kamara nang walang roll call at ni-hindi nakapag-closing speech si House Speaker Feliciano Belmonte Jr.
Sinabi ni Colmenares na kung nagkabotohan lamang kagabi, mai-override ang Aquino veto.
Pero sa halip na harapin ang isang historic moment para sa override, biglang nag-adjourn ang kamara.
Ayon kay Colmenares, kung hindi pagbibigyan ang special session, mapipilitan umano siyang isingit ang pag-override sa Aquino veto sa pag-convene ng kongreso sa Mayo para sa canvassing ng mga boto. “Ilalaban ko ulit ito sa May 23, kung may boto kami kagabi siguradong mas may boto kami sa May 23,” ayon kay Colmenares.
Kaya payo ni Colmenares kay Pangulong Aquino, mas mabauting ipatawag ang special session kaysa sa maabala ang trabaho ng board of canvassers.
Naniniwala si Colmenares na hindi pa tapos ang laban para sa SSS pension hike, at gagawin umano niya ang lahat upang mapakinabangan ito ng mga senior citizen at SSS members.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.