Guanzon kay Bautista: “Hindi mo ako empleyado at hindi mo ako subordinate”
Pumalag si Comission on Elections (Comelec) Commissioner Rowena Guanzon sa inilabas na memorandum ni Chairman Andres Bautista kung saan ay pinagpapaliwanag siya hingil sa umano’y hindi otorisadong komento na ibinigay sa Supreme Court.
May kinalaman ang isyu sa inilabas na Temporary Restraining Order (TRO) ng Mataas na Hukuman sa disqualification cases ni Sen. Grace Poe kung saan ay binigyan ng sampung araw ang Comelec para ipaliwanag ang kanilang posisyon sa isyu.
Sa kanyang Twitter account, sinabi ni Guanzon na hindi siya subordinate at hindi rin siya tauhan ni Bautista.
Binanggit din ni Guanzon na dahil sa nasabing memorandum ay nalagay sa alanganing sitwasyon ang buong Comelec at nakompromiso ang kanilang posisyon sa isyu ng disqualification case ni Sen. Poe.
Nilinaw ni Guanzon na inaprubahan ng Comelec en Banc ang kanyang ginawang tugon para sa Comelec First Division.
Isang araw bago ang January 7 2016 deadline, ipinaliwanag ni Guanzon na kinausap ni Atty. Marina Demetrio, Chief of Staff ni Chairman Bautista ang kanyang Staff.
Hinihingi umano ni Demetrio ang kopya ng kanilang komento na isusumite sa S.C pero dahil hindi pa ito tapos, sinabi ng Staff ni Guanzon na isusumite na lamang nila ang komento kinabukasan, January 7.
Sinabi umano ni Atty. Demetrio na gusto ni Chairman Bautista na ilagay ang kanyang pangalan sa kanilang isusumiteng tugon sa Mataas na Hukuman kahit na walang lagda dito si Bautista.
Sa kanyang pahayag, sinabi ni Guanzon na bilang isang Abogado, nasira ang kanyang kredibilidad dahil sa inilabas na memorandum kung saan ay pinagpapaliwag siya ni Bautista hingil sa umano’y hindi otorisadong sagot ng Comelec sa Supreme Court.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.