Diokno, iimbestigahan pa rin ng Kamara

By Len Montaño February 10, 2019 - 01:06 AM

Tuloy pa rin ang imbestigasyon ng Kamara kay Budget Secretary Benjamin Diokno kahit naratipikahan na ang 2019 national budget at pirma na lang ni Pangulong Rodrigo Duterte ang kulang.

Ayon kay House Appropriations committee chairman Rep. Rolando Andaya Jr., hindi pa tapos ang trabaho ng mga mambabatas kahit naaprubahan na ng bicameral panel ang P3.757 trillion na pondo ngayong taon.

Sinabi ni Andaya na dapat tiyakin ng Kamara ang budget spending accountability.

Patuloy anyang gagampanan ng Kongreso ang oversight function nito para matiyak na ang pondo ng bayan na inilaan sa mga proyekto at programa ng gobyerno ay magagamit alinsunod sa batas.

Ayon sa kongresista, magsasagawa ang House Committees on Appropriations at Public Accounts ng joint public hearings sa umanoy kwestyunableng gawain ng Department of Budget and Management (DBM) sa ilalim ni Secretary Benjamin Diokno.

Nagkakamali anya si Diokno kung sa tingin nito ay pwede na siyang mag-relax dahil hindi pa umano tapos ang imbestigasyon sa anomalyang kinasasangkutan ng kalihim.

Sa susunod na mga linggo ay muling ipapatawag ng Kamara ang mga opisyal ng DBM at Department of Public Works and Highways (DPWH) para matukoy ang umanoy utak ng P75 bilyong insertion sa 2019 national budget.

TAGS: 2019 national budget, Bicameral Conference Committee, budget insertion, DBM Sec. Benjamin Diokno, P75 billion budget insertion, Rep. Rolando Andaya Jr., 2019 national budget, Bicameral Conference Committee, budget insertion, DBM Sec. Benjamin Diokno, P75 billion budget insertion, Rep. Rolando Andaya Jr.

Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.