Isang NGO hiniling na ipawalangbisa ang withdrawal ng Pilipinas sa Rome Statute

By Alvin Barcelona June 14, 2018 - 02:12 AM SHARE(S):

Hiniling ngayon ng isang non-government organization (NGO) sa Supreme Court na pawalangbisa ang notice of withdrawal ng Pilipinas sa United Nations treaty na lumikha sa International Criminal Court (ICC).

Sa 51 pahinang petisyon ng grupong Philippine Coalition for the International Criminal Court (PCICC), iginiit nito na iligal ang nasabing hakbang ng administrasyon.

Iginiit ng PCICC, kailangan ng ehekutibo ang senate concurence bago makapag-isyu ng notice of withdrawal sa Rome Statute.

Sa petisyon, sinabi nito na isang ‘grave abuse of discretion’ at labag sa Konstitusyon sa panig ni Pangulong Rodrigo Duterte ang unilateral na pag-atras ng Pilipinas sa nasabing tratado.

Matatandaang ipinag-utos ni Pangulong Duterte ang pag-atras ng Pilipinas sa Rome Statute matapos na ianunsyo ng ICC noong Pebrero ang pag-iimbestiga nito kaugnay ng kasong mass murder sa ilalim ng anti-drug war ng pamahalaan.

Ito ang pangalawang petisyon laban sa notice to withdraw ng Duterte administration. Una nang nagsampa ng katulad na apela ang grupo nina opposition senator Francis Pangilinan, Franklin Drilon, Bam Aquino, Leila De Lima, Risa Hontiveros, at Antonio Trillanes IV.

Ang PCICC ay binubuo ng mga indibidwal at corporate entities na nangampanya para mapasama ang Pilipinas sa Rome Statute.

TAGS:

Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.