Dating hepe ng Bulacan, itinalagang bagong hepe ng CITF
Mayroon ng bagong mamumuno sa Counter Intelligence Task Force ng Philippine National Police.
Ito’y sa katauhan ni Police Senior Supt. Romeo Caramat.
Sa isang command conference sa Camp Bagong Diwa sa Taguig, inanunsyo ni PNP Chief Oscar Albayalde na si Caramat na ang hahawak sa unit ng PNP na tumutugis sa mga tiwaling pulis.
Pinalitan ni Caramat si Senior Supt. Chiquito Malayo na nakatakdang ma-promote at ililipat naman sa ibang dibisyon.
Ayon kay Albayalde, si Caramat ang napisil nyang humawak ng CITF dahil sa karanasan nito at sa istilo nito ng pamumuno.
Bukod dito malaki raw ang tiwala nya dito dahil masipag itong magtrabaho.
Sabay na hahawakan ni Caramat ang Intelligence Group ng PNP dahil hinirang din syang maging Chief-of-staff nito.
Nakilala si Caramat dahil sa serye ng mga anti-drug operation sa Bulacan kung saan marami ang napapatay at naaresto.
Samantala, nilinaw naman ni Albayalde na sa pagkakaupo sa CITF, internal cleansing ang magiging focus ng trabaho ni Caramat.
Sinabi nya rin na hindi ito hahawak ng anumang anti-drug operations dahil ang pagpapalakas sa counter-intelligence ang panunahin nyang tungkulin.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.