29 preso nakatakas sa kulungan sa Sulu

By Rhommel Balasbas February 25, 2018 - 04:49 AM

Dalawampu’t siyam na mga preso ang nakatakas sa isang police station sa Barangay Walled City sa Jolo, Sulu.

Ayon kay Joint Task Force Sulu commander Brigadier General Cirilito Sobejana, naganap ang jailbreak dakong alas-10:40 ng umaga ng Sabado.

Ani Sobejana, nangyari ang pagtakas ng mga preso nang iwan ng jailguard ang kanyang pwesto.

Gayunman, agad na nahuli ng iba pang mga pulis na naka-duty ang 17 sa 29 na preso na tumakas.

Samantala, isinasagawa na ng mga awtoridad ang manhunt operations para sa ikadarakip ng 12 pang takas.

Nakipag-ugnayan na rin umano sina Sobejana sa mga himpilan ng pulis at mga opisyal ng mga karatig-bayan para matunton ang mga nakatakas na preso.

Napag-alamang 11 sa nakatakas ay may mga kinakaharap na kasong paglabag sa Republic Act 9165 o ang Comprehensive Dangerous Drugs Act of 2002 habang ang isa ay may kasong physical injury.

Kinilala ang mga drug suspects na sina Nurhassan Taasan, Junal Sali, Al-amil kipli, Dante Abdulla, Muthamir Pangambayan, Radzmir Salahuddin, Allim Misah, Abdulwahid Lipae, Alvin Hamdi, Algamer Bantala at Khan Balang.

Ang may kaso namang physical injury ay kinilalang si Herbert Bael.

TAGS:

Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.