Pagbisita ng mga dayuhan sa bansa, tumaas ng 16% nitong Enero

By Kabie Aenlle February 22, 2018 - 02:56 AM SHARE(S):

 

Tumaas ng 16 percent ang bilang ng mga dayuhang bumisita sa bansa nitong nagdaang Enero matapos ang pagsisikap ng pamahalaan at ng mga pribadong sektor na mapalakas ang promotion campaigns at air connectivity sa bansa.

Sa pahayag ng Department of Tourism (DOT) na nakamit nila ang “all-time high” record ng dami ng mga bisitang dumating sa bansa na umabot sa 732,506, na sumasalamin sa 15.97 percent na pagtaas kumpara noong January 2017.

Base sa mga datos na nakalap ng DOT Turism Research and Statistics Divsion-Office of Tourism Planning, bunga ito ng kabuuang pagdami ng mga bumisita sa bansa mula sa China at South Korea.

Nanguna sa bilang ng arrivals ang mga nagmula sa South Korea dahil tumaas ito ng 28.36 percent sa 198,145 kumpara sa naitala noong January 2017.

Tumaas naman ng 29.55 percent ang dami ng mga bisita mula China na nasa 111,344 kumpara sa naitala sa parehong panahon noong nakaraang taon.

Ayon kay Tourism Sec. Wanda Teo, isa itong magandang balita para sa kanila dahil nagbubunga ang kanilang pagsisikap na mapalakas ang industriya ng turismo, na isa sa mga top contributors ng grodd domestic product ng bansa.

Dagdag ni Teo, nadala hanggang sa kasalukuyang taon ang momentum ng pagdami ng mga foreign visitor arrivals dahil sa mas pinagandang air connectivity sa pamamagitan ng mas maraming flights sa pagitan ng Pilipinas at iba’t ibang paliparan sa mga major visitor markets tulad ng China, Korea, United States, Australia at Canada.

Kamakailan lang ay nagbukas na ang Xiamen Airlines ng tatlong beses sa isang linggong commercial direct-flight service sa pagitan ng Fuzhou, China at Kalibo, Aklan, pati na sa Puerto Princesa, Palawan.

Samantala maliban sa China ay gumanda din ang record ng arrivals mula sa Canada, Taiwan, United Kingdom, India, Singapore, Malaysia at Hongkong.

TAGS:

Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.